"ოცნება" თუ პოლიტიკურ კრიზისს ვერ გაუმკლავდება, მესამე ძალა გამოჩნდება - ბოდბელი ეპისკოპოსის სკანდალური განცხადება
"ოცნება" თუ პოლიტიკურ კრიზისს ვერ გაუმკლავდება, მესამე ძალა გამოჩნდება - ბოდბელი ეპისკოპოსის სკანდალური განცხადება

A+ A-

13:57 27/01/2021

"ქართული ოცნება" პოლიტიკურ და ეკონომიკურ კრიზისს თუ ვერ გაუმკლავდება, მაშინ პოლიტიკურ ასპარეზზე მესამე ძალა გამოჩნდება. ამის შესახებ ბოდბელმა მთავარეპისკოპოსმა, მეუფე იაკობმა ამბიონიდან ქადაგებისას განაცხადა.

კონკრეტულად, რომელ პოლიტიკურ ძალას გულისხმობს და ვის მოიაზრებს მმართველი პარტიის ალტერნატივად, უმაღლესი რანგის სასულიერო პირი არ აკონკრეტებს, თუმცა ამბობს, რომ მისი სურვილია, მხარეები შერიგდნენ.

"მე უბრალოდ მინდა, რომ ყველა შერიგდეს. არავის არ გამოვყოფ, თვითონ ხომ იციან არა, ჩართეთ ტელევიზორები და გასაგებია, რატომ არ ვუყურებ ტელევიზორს. აუტანელია ეს პოლიტიკოსები, ნებისმიერი მხარე მიუღებელია", - განაცხადა მეუფე იაკობმა ჟურნალისტების კითხვის საპასუხოდ.

მედიასთან საუბრისას, მან ასევე აღნიშნა, რომ მის ინიციატივას, პოლიტიკურ მოლაპარაკებებში ეკლესია ჩარეულიყო, გამოეხმაურნენ ცალკეული პოლიტიკური ლიდერები, რომლებმაც ქუჩაში, საპროტესტო აქციაზე ხალხიც კი ვერ გამოიყვანეს.

მეუფე იაკობის თქმითვე, პოლიტიკური პროცესების ასე გაგრძელება არ შეიძლება და ეკლესია შეიძლება, დაფიქრდეს, თუ რა ფორმით ჩაერევა პოლიტიკური კრიზისის განსამუხტად.

"ნათქვამი არ მქონდა გამოვიდნენ და სწრაფი განცხადებები გააკეთეს. საერთოდ, ასე საქმის ქუჩაში გამოტანა არ შეიძლება, ხომ ხვდებიან, რომ ქუჩაში ძალა იმდენი არ აქვთ, ხალხი ვერ გამოყავთ. წარმოიდგინეთ ახლა, ეკლესიას რომ დასჭირდეს და ხალხს დაუძახოს, მასე ცოტა ხალხი გამოვა?

იმასაც გვაფიქრებინებენ, რომ ცოტა ისე ჩავერიოთ და მაგასაც მოვიფიქრებთ, ასე გაგრძელება არ შეიძლება. დაღუპავენ საქართველოს იწილო-ბიწილოში.

ცალ-ცალკე ვერავინ ვერ შეძლებს ქვეყნის სწორად წაყვანას, ვინც არ უნდა იყოს", - განაცხადა მეუფე იაკობმა.