გახარია პარლამენტს კოვიდინფექციასთან ბრძოლის წერილობით ანგარიშს გაუგზავნის
გახარია პარლამენტს კოვიდინფექციასთან ბრძოლის წერილობით ანგარიშს გაუგზავნის

A+ A-

12:11 04/06/2020

კორონავირუსის პანდემიასთან დაკავშირებით მომზადებული ანგარიში პარლამენტს წერილობით დღეს წარედგინება. ამის შესახებ საქართველოს პრემიერ-მინისტრმა გიორგი გახარიამ განაცხადა.

მისივე თქმით, ანგარიში მთავრობის ვებგვერდზეც აიტვირთება.

„ჩვენ განვაცხადეთ პარლამენტში ანგარიშის დროს, რომ წერილობით ანგარიშსაც წარვადგენდით „კოვიდ-19“-თან მთავრობის მიერ გადადგმული კონკრეტული ნაბიჯების შესახებ. მოგეხსენებათ, ეს ღონისძიებები დაიწყო იანვრიდან და დასრულდა 22 მაისს. ჩვენ ზუსტად ამ პერიოდის სრული ანგარიში წერილობით მომზადებული გვაქვს, ეს გაეგზავნება დღეს პარლამენტსაც და აიტვირთება მთავრობის შესაბამის ვებგვერდებზე.

 მივიჩნევთ, რომ ეს არის პასუხისმგებლიანი მთავრობის ნაბიჯი, რომელიც თავის მოქალაქეებს და ყველა დაინტერესებულ პირს უხსნის, ამ საგანგებო მდგომარეობის პირობებში, რა მოტივით, რა სქემით, რა სტრუქტურით იყო მიღებული გადაწყვეტილებები, რა იყო ამ გადაწყვეტილებების მოტივაცია და მიზანი.

ეს ყველაფერი არის დეტალურ დონეზე ახსნილი და გაშიფრული ამ ანგარიშში. ასევე, ამ ანგარიშში პირდაპირ მოტანილია ის მიზეზშედეგობრივი კავშირები, რის გამოც მოგვიწია ასეთი მძიმე შეზღუდვების დაწესება მოქალაქეებისთვის და ბევრი სხვა დეტალი.

ფაქტობრივად, აქ არის თითოეული უწყებისა და მთავრობის სრულად გადადგმული ნაბიჯების ანალიზი, მისი ახსნა და მიზეზშედეგობრივი კავშირი ეპიდემიოლოგიურ მდგომარეობასთან და ეკონომიკის შემდგომ განვითარებასთან“, – განაცხადა გიორგი გახარიამ.