მოვუწოდებ ბიზნესოპერატორებს, ეფექტურად ითანამშრომლონ შემოსავლების სამსახურთან - პრემიერ-მინისტრი გახარია
მოვუწოდებ ბიზნესოპერატორებს, ეფექტურად ითანამშრომლონ შემოსავლების სამსახურთან - პრემიერ-მინისტრი გახარია

A+ A-

11:39 21/05/2020

ბიზნესოპერატორებს, რომლებსაც სამსახურიდან თანამშრომლების გაშვება მოუწიათ, პრემიერ-მინისტრი გიორგი გახარია მოუწოდებს, ეფექტურად ითანამშრომლონ შემოსავლების სასმახურთან. ამის შესახებ გახარიამ მთავრობის სხდომაზე განაცხადა.

პრემიერის თქმით, ძალიან მნიშვნელოვანია, ეს დახმარება მოქალაქეებმა რაც შეიძლება სწრაფად მიიღონ და არავინ დარჩეს დახმარების გარეშე.

“გეგმის მიხედვით, ჩვენი ის მოქალაქეები, რომლებმაც დაკარგეს სამსახური, მიიღებენ კომპენსაციას 1200 ლარის მოცულობით, მაგრამ ამ კომპენსაციის მისაღებად ძალზედ მნიშვნელოვანია ეფექტური თანამშრომლობა როგორც მთავრობასა და მოქალაქეს, ასევე მთავრობასა და კონკრეტულ ბიზნესოპერატორებს შორის.

ამიტომ, მე მინდა, მოვუწოდო ყველა იმ ბიზნესოპერატორს, რომელსაც მოუწია სამწუხაროდ, თანამშრომლების სამსახურიდან დათხოვნა, უფრო ეფექტურად და შედეგიანად ითანამშრომლოს შემოსავლების სამსახურთან, ფინანსთა სამინისტროსთან, რამეთუ ამ მოქალაქეების რაოდენობა იყოს უფრო დეტალურად დაფიქსირებული და ჩვენ არ დაგვრჩეს დახმარების გარეშე არც ერთი მოქალაქე, რომელსაც ასეთი დახმარება სჭირდება.

ასევე მინდა დავავალო შემოსავლების სამსახურს, რომ ის მონაცემები, რომლებიც აუცილებელია იმისთვის, რომ სწრაფად და ეფექტურად გაიცეს კომპენსაციები, შეგროვებული იყოს რაც შეიძლება მალე, უმოკლეს ვადებში იმისთვის, რომ თითოეულ მოქალაქემ, რომელსაც ეს დახმარებს სჭირდება, მიიღოს დროულად. ამ დახმარების ფასი არის მხოლოდ და მხოლოდ მაშინ, როცა ჩვენ ამ დახმარებას მოქალაქეებს ვაძლევთ დროულად, მაშინ როდესაც მათ ეს დახმარება სჭირდებათ”, - განაცხადა პრემიერმა.