"ეს არის ძალიან მძიმე შეფასება და ჩვენი ამოცანა არის ამის გამოსწორება"
"ეს არის ძალიან მძიმე შეფასება და ჩვენი ამოცანა არის ამის გამოსწორება"

A+ A-

18:37 03/03/2021

"ევროპული საქართველოს" წევრის სერგი კაპანაძის განცხადებით, Freedom House-ის მხრიდან ქვეყანაში არსებულ მდგომარეობასთან დაკავშირებით მძიმე შეფასებები გაკეთდა და ოპოზიციური პოლიტიკური ძალების ამოცანა ამ მდგომარეობის გამოსწორებაა:

"Freedom House-ის მოხსენება, ისევე, როგორც სხვა საერთაშორისო ანგარიშები, ჩვენ უნდა გამოვიყენოთ როგორც სარკედ იმ რეალობისა, რომელიც ყველამ ვიცით როგორია ქვეყანაში, ამიტომ როდესაც Freedom House-ი, ორგანიზაცია, რომელიც თავისი მიუკერძოებლობით არის ცნობილი, ამბობს, რომ ქვეყანაში გაუარესდა მდგომარეობა, რომ ქვეყანა მიდის არასწორი ტრაექტორიით, როდესაც იმავეს ამბობენ ჩვენი პარტნიორები ამერიკის შეერთებული შტატებიდან, იმავეს ამბობენ ბევრი ქვეყნის საგარეო ურთიერთობის კომიტეტების თავმჯდომარეები, იმავეს მოგვიწოდებენ ევროკავშირის მხრიდან, უნდა გვესმოდეს, რომ ეს არის ძალიან მძიმე შეფასება და ჩვენი ამოცანა არის ამისი გამოსწორება", - განაცხადა სერგი კაპანაძემ.

საერთაშორისო უფლებადამცველი ორგანიზაცია Freedom House-ის შეფასებით, პოლიტიკური უფლებების და სამოქალაქო თავისუფლების მხრივ საქართველოში მდგომარეობა გაუარესდა.

2020 წელს ქვეყანას 100 საუკეთესოდან 61 ქულა ჰქონდა, წლევანდელი შეფასება კი 60-ია. საქართველო ისევ ნაწილობრივ თავისუფალი ქვეყნების სიაშია. ანგარიშში წერია, რომ ოლიგარქიული გავლენა უარყოფითად მოქმედებს ქვეყნის პოლიტიკურ საქმეებზე, პოლიტიკურ გადაწყვეტილებებსა და მედია გარემოზე, ხოლო მართლმსაჯულება პოლიტიზირებულია.

ანგარიშში საუბარია არჩევნებზეც, Freedom House-ის მიხედვით, საქართველოში ტარდება კონკურენტული არჩევნები, რომლის დემოკრატიული ტრაექტორია უმჯობესდებოდა 2012-13 წლებში მთავრობის ცვლილებასთან ერთად, მაგრამ ბოლო წლებში გაუმჯობესების ტენდენციამ იკლო. ანგარიშში ნათქვამია, რომ მმართველმა პარტიამ მესამე ვადით გაიმარჯვა, თუმცა პროცესს ჩრდილი მიაყენა ხმების ყიდვამ, ძალადობის შემთხვევებმა და აშკარა შეცდომებმა მონაცემებში, რამაც ოპოზიციას ბოიკოტისკენ უბიძგა.

საქართველოს ერთ-ერთ მთავარ პრობლემად, ორგანიზაციის ანგარიშში ისევ სასამართლო და კორუფცია რჩება. Freedom House-ის რეიტინგში საქართველოს პოზიცია 2018 წლიდან ეტაპობრივად უარესდება, მაშინ ქვეყანას 64 ქულა ჰქონდა.