ივანიშვილი 2011 წელს, ქართულ პოლიტიკაში შემოვიდა, როგორც ერთადერთი გროსმაისტერი - კობახიძე
ივანიშვილი 2011 წელს, ქართულ პოლიტიკაში შემოვიდა, როგორც ერთადერთი გროსმაისტერი - კობახიძე

A+ A-

13:33 11/01/2021

ბიძინა ივანიშვილი 2011 წელს ქართულ პოლიტიკაში შემოვიდა, როგორც ერთადერთი გროსმაისტერი და ერთ წელიწადში საყმაწვილო შამათით დაამარცხა მეხუთეთანრიგოსანი მოძალადეები. ამის შესახებ "ქართული ოცნების" საპარლამენტო უმრავლესობის ლიდერი ირაკლი კობახიძე აცხადებს. 

მისივე თქმით, ივანიშვილმა პოლიტიკიდან წასვლით დაადასტურა, რომ მისთვის ძალაუფლება არასოდეს ყოფილა მიმზიდველი.

"ჭადრაკის ენაზე რომ ვთქვათ, ბიძინა ივანიშვილი 2011 წელს ქართულ პოლიტიკაში შემოვიდა როგორც ერთადერთი გროსმაისტერი და ერთ წელიწადში საყმაწვილო შამათით დაამარცხა მეხუთეთანრიგოსანი მოძალადეები, რომლებიც, მაშინდელი ოპოზიციის სრული უსუსურობის გამო, ძალიან ბევრს უძლეველი პოლიტიკოსები ეგონა.

ეს კომპლექსი მოძალადეებს დღემდე გამოყვათ და სწორედ ამიტომ იყო ბიძინა ივანიშვილი მათი სიცრუის მანქანის მთავარი სამიზნე მთელი ამ წლების მანძილზე. თუმცა, მან საზოგადოებას აჩვენა იმის მაგალითი, რომ სიმართლე აუცილებლად იმარჯვებს სიცრუესა და ბოროტებაზე.

პოლიტიკიდან წასვლით, ბიძინა ივანიშვილმა კიდევ ერთხელ დაადასტურა, რომ მისთვის ძალაუფლება არასოდეს იყო მიმზიდველი და მისი ერთადერთი ინტერესი პოლიტიკაში ჩვენი ქვეყნის სწორ რელსებზე გადაყვანა იყო. სწორედ ამ სულისკვეთებით შეიტანა მან დემოკრატიული გარდატეხა ჩვენი ქვეყნის განვითარებაში და დაამკვიდრა ახალი კონსტიტუციური წესრიგი. ბიძინა ივანიშვილის პოლიტიკიდან წასვლა არის სერიოზული გამოწვევა როგორც ჩვენი პოლიტიკური გუნდისთვის, ისე ქვეყნისთვისაც.

ბიძინა ივანიშვილი იყო სტაბილურობის უმთავრესი გარანტი ჩვენს ქვეყანაში. ახლა, როდესაც მან მიიღო პოლიტიკის საბოლოოდ დატოვების გადაწყვეტილება, განსაკუთრებული პასუხისმგებლობა გადმოდის გუნდზე და თითოეულ ჩვენგანზე, რათა ბოლომდე მივიყვანოთ ბიძინა ივანიშვილის მიერ დაწყებული საქმე. სწორედ ამ საქმის დაგვირგვინება იქნება საქართველოს გაწევრიანება ევროკავშირში, რაზეც ოფიციალურ განაცხადს ჩვენი ქვეყანა „ქართული ოცნების“ ხელმძღვანელობით 2024 წელს შეიტანს", - წერს კობახიძე სოციალურ ქსელში.

შეგახსენებთ, „ქართული ოცნების“ თავმჯდომარემ, ბიძინა ივანიშვილმა გაავრცელა განცხადება, რომლის თანახმადაც, ის ტოვებს მმართველ პარტიას და იმედს გამოთქვამს, რომ "უტიფარი ოპოზიციის ნაცვლად", გამოჩნდებიან კეთილსინდისიერი ძალები, რომლებიც „ქართულ ოცნებას“ ოპოზიციაში გაუშვებენ.