პოლიციელებისა და სამხედროების უსაფრთხოება მაქსიმალურად არის დაცული - ირაკლი სესიაშვილი
პოლიციელებისა და სამხედროების უსაფრთხოება მაქსიმალურად არის დაცული - ირაკლი სესიაშვილი

A+ A-

15:55 26/03/2020
"ვემზადებით რთული სცენარებისთვის, მაგრამ ვართ მოტივირებული და იმედიანი, რომ ამ ვირუსს დავამარცხებთ", - ამის შესახებ თავდაცვისა და უშიშროების კომიტეტის თავმჯდომარე ირაკლი სესიაშვილმა მარნეულის ბლოკ-პოსტთან ჟურნალისტებს განუცხადა.
 
მისივე განცხადებით, პოლიციელებისა და სამხედროების უსაფრთხოება მაქსიმალურად არის დაცული.
 
„ჩვენი ჯარისკაცები და პოლიციელები ზედმიწევნით ასრულებენ შესაბამის წესებს, ინსტრუქციებს, პროტოკოლს და ასევე, მაქსიმალურად დაცულია მათი ჯანმრთელობა, სპეციალისტების რჩევების მიხედვით. მეც გავიარე ყველა პროცედურა, სანამ გავეცნობოდი მათ საყაზარმო პირობებს. მინდა, მადლობა გადავუხადო და გავამხნევო ისინი იმიტომ, რომ ეს არის მთელი მსოფლიოს გამოწვევა და ძალიან რთული პერიოდი გვიდგას, მაგრამ იმედიანად ვართ.
 
ვემზადებით რთული სცენარებისთვის, მაგრამ ვართ მოტივირებული და იმედიანი, რომ ამ ვირუსს დავამარცხებთ. ვინაიდან არ მაქვს შესვლის უფლება, მინდა აქედან გავამხნევო ჩვენი მაჟორიტარი დეპუტატები გოგი მეშველიანი და თამაზ ნავერიანი, რომლებიც მართლაც დღე და ღამე მუშაობენ ადგილობრივ ხელისუფლებასთან ერთად.
 
იცით, რომ ათასობით მოსახლეობის შემოწმება ხდება, ასევე ხორციელდება მთელი რიგი სამუშაოები, ხდება მოწყვლადი მოსახლეობის მხარდაჭერა პროდუქტით და სხვა საჭიროებებით. ამიტომ მინდა ისინი გავამხნეო და ვუსურვო მათ ჯანმრთელობა და ამ ვირუსზე გამარჯვება,“ - განაცხადა სესიაშვილმა.
 
ცნობისთვის, ამ დროისთვის საქართველოში კორონვირუსის 77 შემთხვევაა დაფიქსირებული. აქედან 10 უკვე გამოჯანმრთელდა, 67 ისევ ებრძვის კორონავირუსს, მათგან ერთი კი 62 წლის მარნეულელი ქალი, კრიტიკულ მდგომარეობაში იმყოფება.